O glaso savo pučel.

Sostar kerđam ROMA VOICE thaj so kamas te keras?

ROMA VOICE si jekh nezavisno medijsko, obrazovno hem istraživačko platforma savi amen e Roma kerđam, te šaj amare Roma hem Romnja slobodno te vakeren, te pučen, te las informacije, te roden o čačipe, te bararen pumaro džandipe hem te keren buti ko jekipe.

Kada platforma keras amen, e Roma andar amaro romanipe. Paćas kaj amare narodose isi džandipe hem sposobnost, hem kaj maškar amende isi manuša save si spremne te len odgovornost hem te keren lačhe promene.

Amen na kamas samo te vakaras tari problemura amare Romengere. Kamas ko jekipe amare manušenca te rodas sostar aven kadala problemura, so anen amare narodose hem sar šaj te arakhas drom te rešisaras len.

Kamas te menjisaras o način sar amare Romen sikaven angle javer manuša. Ama kamas hem amen korkore te dikhas o čačipe ko amaro romanipe, te dikhas sar trajisaras, save problemura isi maškar amende hem so trubul te menjisaras, te šaj te džas angle.

Amen na kamas te avas samo jekh glaso savo šunel pes kana nekaske trubul, hem jekh brojo ande statistike, političke programura hem projektura.

Kamas te avas manuša save korkore pučen, istražin hem keren buti ko jekipe. Kamas hem amen te las than ande odluke save phanden pe amari avutni vrjamasa.

Rom aso e Roma – direktne informacije, bi manipulacijako

Jekh andar amare majbare ciljura si te das amare narodose čače informacije, te sikavas e dokumentura hem te las odgovornost vaš sa so vakaras.

Kamas amare Romenge hem Romnjenge te das informacije save si temelime ko čačipe, ko javno dostupne dokumentura, ko istraživanja, svedočenja hem ko izvora save šaj te proverin pe.

Amari buti naj te phenas e manušenge so von musaj te gindin, ande soste musaj te paćan, hem kaske musaj te pripadin.

Kamas amare manuša te bararen pumaro džandipe, te gindin pumare šeresa, te pučen hem korkore te odlučisaren so si čačipe.

Na kamas te del amen javer gotovo odgovori. Kamas sako manuš korkoro te rodel, te proveril hem te arakhel o čačipe.

Kamas te ulavas so si čačipe hem so si samo mišljenje. Kamas te džanas kaj isi dokazura, a kaj si samo pretpostavke.

E purane istorijske dokumentura trubul te dikhas sar si pisime, a na samo sar len adžives javer manuša tumačisaren.

Kana kerasa jekh greška, na kamas te garavas la. Kamas angle savore te phenas kaj grešisardam hem te ispravisaras la.

Kana phenasa jekh bari tvrdnja, kamas te sikavas save dokumentura hem izvora isi amen vaš adava.

Rom aso e Roma značinel kaj amen samas odgovorne angle amaro narodo. Ama adava na značinel kaj amen šaj te vakaras ando nav sa e Romengo hem te odlučisaras pala lende bi te pučas len.

Kamas amare Roma hem Romnja korkore te vakeren, te pučen, te bararen pumaro džandipe hem te len than ande odluke save phanden pe olengere trajosa.

Amaro glaso trubul te avel ko jekipe amare narodosa, a na upral leste.

Diskriminacija – avrijal hem ko amaro romanipe

ROMA VOICE kamel te vakarel tari diskriminacija, tare predrasude, tari socijalno nejednakost hem tari nepravda savi keren amare Romenge hem Romnjenge.

Ama amari buti na ačhela samo ko adava so javer manuša keren amare narodose. Kamas otvoreno te vakaras hem tare problemura save isi maškar amende, ko amaro romanipe.

Varekana amare Roma na poštuisaren jekh avres. Isi podele maškar amende. Na savore isi len iste mogućnostura.

Kamas te vakaras hem tari nepravda savi doživisaren amare Romnja hem amare terne. Kana na keras buti ko jekipe, kana na šunas jekh avres hem kana na poštuisaras jekh avres, adava kerel amaro anglunipe majpharo.

Na kamas te garavas kadala problemura samo te sikavas jekh majšukar slika taro amaro romanipe. Kamas te arakhas o čačipe hem ko jekipe te rodas drom sar te rešisaras len.

Ama na kamas hem te mukhas kaj vaš e greške jekhe manušeske te dosarin sa e Romen.

Kamas te sikavas o čačipe taro amaro romanipe: amaro džandipe, amari kultura, amare lačhe butja hem amare uspehura, ama hem e problemura save isi amen.

Amaro anglunipe avela kana amen korkore dikhasa amare problemura, šunasa jekh avres hem kerasa buti ko jekipe.

Manipulacija – medije, religija, politika hem društvo

Posebno kamas te dikhas sar informacije, autoritetura, institucije hem javer društvene strukture šaj te utičin ko gindipe hem odluke e manušengere.

Adžives but manuša šunen so vakaren televizije, političarura, verske vođe hem javer manuša save isi len autoritet. Ama amen kamas te pučas: da li sa so von vakaren si čačipe?

Kamas te istražisaras sar e medije, politika, religija hem javer institucije šaj te utičin ko gindipe e manušengo.

Kamas te sikavas sar šaj te koristin informacije te daran e manušen, te den len lažne informacije hem te upravljin olengere odlukenca.

Ama amari buti naj te napadisaras nekaski vera, nekasko političko mišljenje hem nekasko lično paćavipe.

Amari buti si te arakhas o hakaj svakone manušesko: te gindil pumare šeresa, te pučel, te istražil hem korkoro te arakhel o čačipe.

Amen samas protiv korupcija, protiv e manušengo save koristin pumaro položaj hem o paćavipe javer manušengo samo vaš pumare interesura.

Na dikhas kaske si o položaj, savi religija isi le, hem ande savi politika si. Kana isi nepravda, kamas te pučas hem te rodas o čačipe.

Kamas te džanas so kerel pes e javne parenca hem e projekturenca save si namenime amare Romenge. Ko lel e pare? Ko kerel e projektura? So si obećime amare narodose? Hem so čačes si kerdo?

Na kamas te dosarisaras nekas bi dokazura. Kamas angleder te dikhas e dokumentura, te proverisaras e informacije hem pala adava te vakaras.

Amaro narodo naj samo jekh brojo ande projektura. Amare Roma isi len hakaj te džanen so kerel pes ande olengo nav hem kaj džan e pare save si dine vaš lende.

E terne Roma hem Romnja – ando maškar amari butjako

Jekh andar amare majbare ciljura si te phandas e terne Romen hem Romnjen save trajin ande Zapadno Evropa hem ande javer thema.

Kamas te džanas sar trajin amare terne, save problemura isi len, so falil lenge hem so von kamena tari pumari avutni vrjama.

Kamas te šunas olengo glaso, te džanas save mogućnostura isi len vaš škola, vaš buti hem vaš lačho trajo.

Kamas te istražisaras lengere potrebi tari škola, buti, ravnopravnost, identitet, kultura hem sar šaj te len than ando društvo.

ROMA VOICE na kamel amare terne te oven samo manuša save šunen hem dikhen.

Kamas amare terne korkore te vakeren, te pučen, te bararen pumaro džandipe hem te keren buti ko jekipe.

Kamas te oven novinarura, istraživačura, voditeljura, autorura hem manuša save korkore keren neve projektura vaš amaro romanipe.

Korako palo korako kamas te keras jekh bari mreža amare terne Romengeri hem Romnjengeri, andar but thema hem forura.

Kamas e terne te upoznajin jekh avres, te ulaven pumaro džandipe, pumare iskustvura hem informacije.

Kamas te sikljon jekh kotar javer, te džanen save hakaja isi len hem sar šaj korkore te arakhen pumare hakaja.

Kamas te džanen sar keren buti e škole, e institucije hem e političke organizacije; kaske šaj te pučen, kaj šaj te roden pomoć hem sar šaj te učestvujin ande odluke save phanden pe olengere trajosa.

Na kamas amare terne te ačhen samo manuša save šunen so javer odlučisaren.

Kamas e terne te oven manuša save korkore vakeren, pučen, istražin hem odlučisaren tari pumari avutni vrjama.

Amaro anglunipe avela kana amare terne bararena pumaro džandipe hem kerena buti ko jekipe.

Društvene mreže, dokumentarne epizode, casting hem LIVE emisije

ROMA VOICE na ačhela samo jekh internet stranica.

Kamas te avas hem ko društvene mreže, kaj amare Roma hem Romnja šaj te dikhen amare emisije, te šunen so vakaras hem korkore te pučen.

Kamas te keras emisije save ka den amare narodose informacije, ka bararen pumaro džandipe hem ka sikaven o čačipe tari problemura save isi ko amaro romanipe.

Kamas te keras buti ko jekipe amare ternenca, te den pumare ideje hem te sikaven so džanen.

Kamas te keras kadala emisije hem projektura:

• Dokumentarne hem istraživačke epizode – te rodas o čačipe tari istorija amare Romengeri, tari diskriminacija, religija, politika, škole hem kultura. Te sikavas dokumentura hem izvora.
• Emisije kaj vakaras e manušenca – te akharas e terne Romen, Romnjen, stručnjakuren hem javer manušen save isi len džandipe hem iskustvo, te šaj te ulaven adava amare narodosa.
• Casting emisije – te arakhas amare terne talentura: manušen save džanen te vakaren angle kamera, te keren muzika, te pišin, te istražin hem te oven saradnikura ROMA VOICE.
• LIVE emisije – otvorene razgovorura kaj sako manuš šaj te pučel, te phenel pumaro mišljenje hem te vakarel tari problemura save isi le.
• Istraživanja hem medijske projektura – e terne Roma hem Romnja andar različite forura hem thema šaj te keren buti ko jekipe, te ulaven informacije hem te sikljon jekh kotar javer.

Prekal amare emisije kamas majlačhe te džanas sar trajin amare terne Roma hem Romnja ande Zapadno Evropa hem ande javer thema.

Kamas te šunas olengere problemura, olengere ideje hem so lenge trubul vaš jekh majlačho trajo.

Kamas te džanas save razlike isi maškar e terne hem e phure Roma, hem sar trajin amare manuša ande različite thema hem forura.

Na kamas te keras emisije samo tari e terne Roma. Kamas te keras len ko jekipe amare ternenca.

Sako manuš trubul te šaj te pučel, te phenel pumaro mišljenje hem te ulavel pumaro džandipe.

Kamas te poštuisaras jekh avres, hem kana na gindisaras isto.

ROMA VOICE trubul te avel than kaj amare Roma hem Romnja šaj slobodno te vakeren, te sikljon hem te keren buti ko jekipe.

Te arakhas amari romani čhib, istorija, kultura hem tradicija

ROMA VOICE kamel te arakhel amari romani čhib, amari istorija, kultura hem tradicija, te na našaven pe kadala barvalipa amare narodostar.

Kamas amare čhave hem amare terne te džanen tari amari istorija, tari amari čhib hem tari amaro romanipe.

Amare Roma trajin ande but thema. Na savore vakaren isto romanes. Isi but dijalektura, običaja hem tradicije.

Amen na kamas te našavas kadala razlike. Kamas te arakhas len, te poštuisaras len hem te sikavas amare ternenge.

Kamas amare phure Roma hem Romnja te vakaren so džanen, so dikhlje ando pumaro trajo hem so šunde pumare dadendar hem dajendar.

Amare terne trubul te šunen amare phuren, te bararen pumaro džandipe hem te arakhen amari istorija vaš e generacije save avena pala amende.

Kamas te rodas e purane dokumentura save vakaren tari istorija amare Romengeri.

Kamas te džanas kaj hem kana trajisarde amare phure Roma, save droma nakhle hem so ačhilo andar olengo trajo.

Ama trubul te ulavas so si čačes pisime ande istorijske dokumentura, hem so si samo purane paramiča save manuša vakaren jekh avreske.

Na kamas te phenas kaj sa e Roma isi len jekh ista tradicija, jekh ista čhib hem jekh isto trajo.

Amaro romanipe si barvalo. Isi amen but dijalektura, but običaja, muzika, tradicije hem različite istorijske iskustvura.

Amen šaj te arakhas amari kultura hem amaro romanipe, a istovremeno te džas angle, te bararas pumaro džandipe hem te keras majlačhi avutni vrjama amare čhavenge.

Amari istorija naj samo adava so nakhlo. Oj si hem jekh kotor amari avutni vrjamako.

Ko jekipe – te keras buti bi neve podelengo

ROMA VOICE kamel te kerel jekh than kaj amare Roma hem Romnja andar različite thema hem forura šaj te upoznajin jekh avres hem te keren buti ko jekipe.

Amen samas jekh narodo, ama na savore trajisaras isto. Isi amen različite vere, različite političke mišljenja, različite dijalektura hem običaja.

Ama kadala razlike na trubul te ulaven amen.

Na trubul savore te paćas ande jekh isto vera, te gindisaras isto hem te vakaras isto romanes, te šaj te keras buti ko jekipe.

Kamas te sikljon amare manuša te šunen jekh avres, te poštuisaren jekh avres hem te vakaren bi darako, čak hem kana na si len isto mišljenje.

Amaro romanipe na trubul te avel razlog vaš neve podele. Amaro romanipe trubul te avel amari zor te keras buti ko jekipe.

Amen na musaj savore te gindisaras isto. Ama trubul te džanas te vakaras jekh avresa, te šunas jekh avres hem te poštuisaras jekh avres.

Kana javer manuš phenel pumaro mišljenje, na trubul odmah te dosarisaras les. Trubul te šunas so vakarel hem te proverisaras si li adava čačipe.

Kamas ROMA VOICE te avel jekh platforma kaj sa so vakaras šaj te proveril pe. Kana keras greška, trubul te priznajisaras la hem te ispravisaras.

Na kamas samo te das informacije. Kamas hem te šunas so amare Roma hem Romnja vakaren, save pučipa isi len hem so kamena te menjisaren.

Amen na phenas kaj vakaras ando nav sa e Romengo. Kamas te keras jekh than kaj amare manuša šaj korkore te vakaren ando pumaro nav.

Amari zor naj te komanduisaras jekh avres. Amari zor si te šunas jekh avres, te bararas pumaro džandipe hem te keras buti ko jekipe.

Amari poruka amare Romenge

Phrala hem phenja,

ROMA VOICE na kerđam te avas amen javer manuša save ka phenena amare narodose so musaj te gindil, ande soste musaj te paćal hem kaske musaj te šunel.

Kada platforma kerđam te bararas maškar amende o džandipe, te šunas jekh avres, te keras buti ko jekipe hem korkore te odlučisaras tari stvarura save phanden pe amare trajosa.

Kamas te sikavas angle javer manuša so amare Roma džanen, save lačhe butja keren, savi kultura isi amen hem savo barvalipe isi ko amaro romanipe.

Ama kamas hem amen korkore te dikhas amare problemura. Na trubul te daras te pučas, te vakaras hem te rodas o čačipe.

Amen na phenas kaj isi amen rešenje vaš sako problem. Ama kamas te rodas e dokumentura, te razumis e problemura hem ko jekipe te arakhas drom sar te rešisaras len.

Na kamas te avas samo jekh glaso savo šunel pes kana nekaske trubul, hem jekh brojo ande statistike, politika hem projektura.

Kamas te avas manuša save korkore pučen, istražin, sikljon, bararen pumaro džandipe hem keren buti ko jekipe.

Kamas amare Roma hem Romnja te šaj korkore te vakeren hem te len than ande odluke save phanden pe olengere trajosa.

Amari avutni vrjama trubul te avel hem ande amare vast.

ROMA VOICE – O glaso savo pučel.

Rom aso e Roma. Čače informacije. Transparentno buti. Bi manipulacijako.